Паседжанне абласной адміністрацыі і прэзідыума аблсавету ў Гародні па стварэнні акруговых выбарчых камісій адбудзецца ў панядзелак 9 ліпеня а 10:30.

Прадстаўнік БХК Раман Юргель заранёў падаў адпаведнае накіраванне ад сваёй арганізацыі, каб прысутнічаць на паседжанні. Аднак супрацоўніца канцылярыі аблвыканкаму сказала Юргелю 5-га ліпеня, што ніякай паперы яны не атрымлівалі. Тады Юргель звярнуўся да начальніка ўпраўлення арганізацыйна-кадравай работы Леаніда Ермантовіча. Высветлілася, што накіраванне ад БХК у яго. Чыноўнік паведаміў, што адбудзецца паседжанне аблвыканкаму, дзе вырашыцца пытанне наконт прысутнасці прадстаўніка БХК на фармаванні акруговых выбарчых камісій.

Ермантовіч сказаў, што, згодна з Выбарчым кодэксам Рэспублікі Беларусь і пастановамі ЦВК, па гэтым накіраванні могуць дапусціць на паседжанне, а могуць і не дапусціць. Урэшце Рамана Юргеля праз тэлефон 6 ліпеня ўсё ж запрасілі на паседжанне 9 ліпеня. Пры тым высветлілася яшчэ, што ксеракопія накіравання БХК на вылучэнне Юргеля на паседжанне было дадаткова прадстаўлена начальніку ўпраўлення ідэалогіі Паўлу Скрабко і начальніку аддзела дакументаабароту, пратакольнай і кантрольнай работы Юрыю Дробышаву.

"Праваабаронцы за свабодныя выбары"