Такую рэкамендацыю прэзідэнт выказаў на сустрэчы са старшынёй Палаты прадстаўнікоў Нацыянальнага сходу Уладзімірам Андрэйчанкавым.

“У нас склалася добрая практыка, што цяперашні парламент, пакуль не будзе абраны новы і не здабудзе свае паўнамоцтвы, прымае найважнейшыя законы, якія звязаныя з бліжэйшым будучым, перш за ўсё, бюджэт і асноўныя напрамкі развіцця нашай краіны на наступны год, - адзначыў Аляксандр Лукашэнка . - Таму я папрасіў бы разам з урадам сур'ёзна прапрацаваць гэтае пытанне.  Ураду дадзеныя адпаведныя даручэнні, і трэба, каб цяперашнія дэпутаты - а гэта дасведчаныя людзі, якія ў курсе ўсіх пытанняў - прынялі бюджэт і асноўныя напрамкі развіцця краіны, без якіх немагчымая арганізацыя работы на будучы год”.

Лукашэнка таксама паабяцаў працаўладкаванне цяперашнім дэпутатам, якія не будуць абраныя ў наступны склад Палаты прадстаўнікоў. “Пажадана, каб у новы парламент увайшла трэць дэпутатаў ранейшага склікання, - заявіў ён. - Мы даўно дамовіліся, што парламент - гэта школа, і людзі, якія прайшлі гэтую школу, не павінны быць страчаныя, бо дзяржава занадта шмат на гэта затраціла. Кожны дэпутат павінен быць працаўладкаваны ў адпаведнасці з ведамі, вопытам, ягоным жаданнем”.

Абраныя ў 2008 годзе дэпутаты за чатыры гады разгледзелі больш за 650 законапраектаў, прынялі 268 новых законаў і ўнеслі 134 папраўкі ва ўжо існуючыя нарматыўныя акты. Аднак суб'ектам права заканадаўчай ініцыятывы практычна ўсіх гэтых дакументаў былі альбо ўрад, альбо прэзідэнт. Паводле дадзеных сайта беларускага парламента, адзіным дакументам, прынятым у выніку заканадаўчай ініцыятывы дэпутатаў, быў закон «Аб абыходжанні з жывёламі» (зацверджаны ў лістападзе 2011 года).

"Праваабаронцы за свабодныя выбары"