Пры рэгістрацыі ініцыятыўных груп па вылучэнні кандыдатаў у дэпутаты актывісты партыі "Справядлівы свет" не атрымалі ніводнай адмовы. Па ўдакладненых дадзеных, шляхам збору подпісаў будуць вылучацца 25 актывістаў партыі, паведаміў намеснік старшыні "Справядлівага свету" Валерый Ухналёў.

Зарэгістравалі і ўсе 15 ініцыятыўных груп ад 12 актывістаў Партыі БНФ, у тым ліку чатыры групы кіраўніка Гродзенскай абласной арганізацыі партыі Вадзіма Саранчукова.

Адразу ў трох акругах Мінска - Старавіленскай № 105, Ясенінскай № 100 і Купалаўскай № 95 - зарэгістраваныя ініцыятыўныя групы па вылучэнні лідэра АГП Анатоля Лябедзькі.

Акрамя таго, у сталіцы зарэгістравана ініцыятыўная група яшчэ аднаго прадстаўніка АГП - Валянціны Аліневіч, маці палітвязня Ігара Аліневіча. Як паведамляе прэс-служба АГП, калі Валянціну Аліневіч зарэгіструюць кандыдатам у дэпутаты, яна абяцае прысвяціць свой выступ на тэлебачанні праблеме палізняволеных Беларусі.

Усяго ад АГП зарэгістравана 6 ініцыятыўных груп, у тым ліку 4 мінскія. У Брэсце ініцыятыўная група створана для вылучэння Дыяны Касцюковіч, у Барысаве балатуецца намеснік старшыні партыі Леў Марголін.

У Івацэвіцкай выбарчай акрузе № 11 адмоўлена ў рэгістрацыі групы па вылучэнні сябра АГП Вікторыі Грынюк. Адмову патлумачылі адсутнасцю ў кіраўніка ініцыятыўнай групы, які падаваў заяву, даверанасці ад самога патэнцыйнага кандыдата ў дэпутаты.

Грамадзянская кампанія "Гавары праўду!" атрымала дзве адмовы ў рэгістрацыі ініцыятыўных груп сваіх актывістаў - не зарэгістраваныя групы Івана Амельчанкі, які балатаваўся ў сталічнай Каліноўскага выбарчай акрузе № 108, і Пятра Лебедзева, які падаваў заяву ў Жлобінскую акругу № 40. У абодвух выпадках камісіі адмовілі ў рэгістрацыі ў сувязі з тым, што прэтэндэнты не падавалі заявы асабіста, а адправілі іх па пошце.

Усяго ад "Гавары праўду!" зарэгістравана 25 ініцыятыўных груп, паведаміў Сяргей Вазняк.

"Праваабаронцы за свабодныя выбары"