Старшыня ЦВК Лідзія Ярмошына заявіла, што сёлета было адмоўлена 85 групам – гэта 19%. На папярэдніх выбарах паказальнікі былі лепшымі – 5% адмоваў у 2008 годзе і 11% адмоваў у 2004.

Па словах Ярмошынай, адмовы датычыцца 15 патэнцыйных кандыдатаў, частка якіх вылучалася адразу па некалькіх акругах. На сустрэчы з кіраўніком місіі назіральнікаў ад СНД Сяргеем Лебедзявым яна адзначыла, што зараз можна казаць аб 330 асобах, якія зарэгістравалі свае ініцыятыўныя групы. З іх 66 чалавек – сябры палітычных партыяў: апазіцыйныя  -  “Справядлівы свет” (28 ініцыятыўных груп), БНФ (12 ініцыятыўных груп), АГП (7 ініцыятыўных груп), БСДП(Г) (каля 9 ініцыятыўных груп), неапазіцыйныя  - Камуністычная партыя Беларусі, Рэспубліканская партыя працы і справядлівасці.

Такім чынам, сёлета было пададзена 439 заяваў на рэгістрацыю ініцыятыўных груп, 85 групам адмовілі  - працэнт адмовы склаў 19%.
На парламенцкіх выбарах у 2008 годзе было пададзена 447 заяваў на рэгістрацыю ініцыятыўных груп, 23 з іх не зарэгістравалі – гэта 5% адмовы. На выбарах у 2004 годзе заяваў было 635, не прайшлі рэгістрацыю 71 або 11% ініцыятыўных груп.

“Праваабаронцы за свабодныя выбары”