Для правядзення парламенцкіх выбараў у гэтым годзе створана 6349 участкаў для галасавання, што на 178 менш, чым падчас папярэдняй парламенцкай выбарчай кампаніі. Пра гэта 26 ліпеня заявіла кіраўнік ЦВК Лідзія Ярмошына.

Паводле яе слоў, скарачэнне колькасці участкаў назіраецца па ўсіх абласцях, за выключэннем Мінска, дзе ў гэтым годзе з'явілася 19 новых участкаў.

За межамі Беларусі будзе працаваць 44 ўчастка, чатыры з іх - у Расійскай федэрацыі, паведаміла Ярмошына. Яна нагадала, што ўчастковыя выбарчыя камісіі будуць створаны да 8 жніўня.

Падчас прэс-канферэнцыі журналісты пацікавіліся ў кіраўніка ЦВК, як будзе працаваць акруга, да якога далучаюць замежныя выбарчыя ўчасткі, паколькі кандыдаты звычайна незадаволеныя тым, што не могуць агітаваць за мяжой. Ярмошына адказала, што колькасць выбаршчыкаў за мяжой настолькі мала, што «яны не могуць паўплываць на зыход выбараў наогул».

Паводле яе слоў, замежныя ўчасткі адносяць да той выбарчай акругі, на тэрыторыі якой размешчана Міністэрства замежных спраў.

«Што тычыцца незадаволенасці кандыдатаў, то яны самі выбіраюць выбарчыя акругі. Тым не менш, гэты акруга заўсёды запоўнена кандыдатамі», - заявіла Ярмошына.

«Праваабаронцы за свабодныя выбары»