З сайту Пінскага гарвыканкама знялі інфармацыю пра пікеты, ілюстраваную фотаздымкамі з перагорнутым дзяржаўным сцягам, пад якім актывісты “Белай Русі” збіралі подпісы за праўладную кандыдатку і дзеючую дэпутатку ПП НС Зінаіду Мандроўскую.

Магчыма, падставаю для гэтага сталі заўвагі пінчукоў, пра якія паведамлялі “Праваабаронцы за свабодныя выбары”.

Аднак, як кажуць, ні дня без хібаў. Ні адно – дык другое.

З учорашняга дня ў “Навінах выбарчай кампаніі”, якімі зрэдку “радуе” сайт гарвыканкаму, анансуецца паседжанне па фармаванні ўчастковых камісій, якое адбудзецца “паслязаўтра, 8 ліпеня, у 10.00” . Наўрад ці гэта спроба ўвесці ў зман зацікаўленых удзельнікаў выбарчага працэсу ды назіральнікаў. Разам з тым гэты чарговы “ляп” – толькі лішняе пацверджанне абыякавага стаўлення рознага ўзроўню ўладаў да бягучай парламенцкай кампаніі.

“Праваабаронцы за свабодныя выбары”