Апошняя публікацыя выбарчай тэматыкі ў брэсцкай газеце “Заря” пад назвай ”Сцэнкі вакол ацэнкі”  прысвечаная справаздачы ацэначнай місіі БДІПЧ АБСЕ, высновы якой аўтар артыкула Яўген Літвіновіч назваў “прадказальна памылковымі”.

Журналіст папракнуў міжнародную арганізацыю ў тым, што яны аддавалі перавагу інфармацыі ад прадстаўнікоў грамадзянскай супольнасці, што маюць апазіцыйныя погляды. “Вакол “незалежнай” ацэнкі разгарнулася сапраўднае тэатральная дзея, у якой “гледачам” з АБСЕ старанна падыгрывалі мясцовыя ангажаваныя “артысты”, якія спрабуюць прадставіць выбарчую кампанію далёка не ў праўдзівым святле”, - адзначае Літвіновіч.

Далей аўтар аспрэчвае высновы місіі пра тое, што цікавасць беларускіх грамадзян да выбараў даволі нізкая, а давер грамадства да выбарчага працэсу адсутнічае. У супрацьвагу ён прыводзіць дадзеныя сацыялагічных даследаванняў паводле Інфармацыйна-аналітычнага цэнтру пры Адміністрацыі прэзідэнта, якія сведчаць аб адваротным: каля 83% паўналетніх беларусаў збіраюцца прымаць удзел у парламенцкіх выбарах, пры гэтым 84% апытаных схільныя давяраць іх вынікаў. “Да такіх паказчыкаў яшчэ імкнуцца і імкнуцца самай дэмакратычнай дзяржаве Еўропы, дзе палітычная актыўнасць насельніцтва нярэдка з'яўляецца паняццем з разраду чыста намінальных”, - павучае аўтар публікацыі, не ўзгадваючы, пра якую краіну ідзе гутарка.

Увогуле Яўген Літвіновіч знайшоў ажно чатыры высновы ў справаздачы, якія, на ягоную думку, не адпавядаюць рэчаіснасці. А паколькі “памылкі” ацэначнай місіі АБСЕ – гэта нібыта вынік таго, што “эксперты занадта даверліва паставіліся да інфармацыі нядобрасумленных крыніц”, аўтар сцвярджае: “Сёння некаторыя апаненты дзеючай улады заяўляюць, што іх задача зрабіць не так, каб выбары прайшлі свабодна і дэмакратычна, а так, каб знайсці як мага больш недахопаў”. Таму журналісмт заклікае не надта давяраць незалежным назіральнікам, бо яны прыцягваюць увагу сусветнай грамадскасці “да далёкіх ад жыцця тэм”.

“Праваабаронцы за свабодныя выбары”