Ніякай інфармацыі назіральнікам не даваць -- дала распараджэнне  сябрам акруговай выбарчай камісіі № 2 г.Брэста старшыня камісіі Галіна Янголенка пасля таго, як назіральнік Уладзімір Вялічкін папрасіў пісьмова дазволу прысутнічаць пры праверцы подпісаў і іншых дакументаў, пададзеных вылучанымі прэтэндэнтамі ў кандыдаты. Спадарыня  Янголенка сваю адмову аформіла пісьмова, спаслаўшыся на арт. 13 Выбарчага кодэксу. Таксама назіральніку не дазволілі азнаёміцца з журналам уваходзячых і зыходзячых дадзеных, з журналам уліку назіральнікаў, з пратаколамі паседжання камісіі. Старшыня камісіі Янголенка наогул сказала, што ён павінен быў удзячны, што яго запрашаюць на паседжанні.

16 жніўня  Вялічкін вымушаны быў звярнуцца са скаргай у ЦВК, у якой праінфармаваў пра закрытасць працы акруговай камісіі і папрасіў забяспечыць выкананне правоў назіральніка. У сваёй скарзе Вялічкін спаслаўся на арт. 13 Выбарчага кодэкса і арт. 65 Канстытуцыі РБ, якія гарантуюць адкрытасць і галоснасць выбараў.

19 жніўня назіральнік атрымаў адказ з ЦВК за подпісам Лідзіі Ярмошынай, у якім старшыня Цэнтрвыбаркаму падтрымала дзеянні акруговай камісіі і папракнула Вялічкіна няведаннем выбарчага заканадаўства, параіўшы кіравацца ч. 4 і 5 арт. 13 ВК.

“Праваабаронцы за свабодныя выбары”