Учора каля 23.30 у аграгарадку Вялікая Машчаніца супрацоўнікі бялыніцкай ДАІ спынілі аўтамабіль кандыдата ў дэпутаты Палаты прадстаўнікоў па Шклоўскай выбарчай акрузе № 90, намесніка старшыні партыі БНФ Рыгора Кастусёва. Міліцыянераў хвалявала пытанне, ці не перавозіць кандыдат у дэпутаты “забароненую літаратуру”.

“Я толькі крыху ад’ехаў ад хаты майго сябра Барыса Вырвіча ў Машчаніцы, дзе мы з ім і з маёй даверанай асобай, бялыніцкім актывістам партыі БНФ Мікалаем Мяцеліцам, абмяркоўвалі пытанні арганізацыі перадвыбарчай кампаніі, як мяне нагнала міліцэйская машына з уключанай мігалкай, - распавядае Рыгор Кастусёў. – Час быў вельмі позні, каля паловы на дванаццатую ночы, і ў мяне склалася ўражанне, што супрацоўнікі міліцыі мэтанакіравана чакалі, калі я буду ехаць. Міліцыянеры запатрабавалі, каб я спыніў аўтамабіль, я выканаў іх загад. Да мяне падышоў супрацоўнік ДАІ, які папрасіў паказаць дакументы на аўтамабіль. Але хвалявала яго зусім іншае пытанне, ён асвятліў салон маёй машыны і пацікавіўся, ці не перавожу я “забароненую літаратуру”. Я супакоіў супрацоўніка міліцыі, што ніякай забароненай літаратуры ў мяне няма, пасля гэтага ён даў дазвол мне ехаць далей. Агляда майго аўтамабіля супрацоўнікі міліцыі не праводзілі, толькі асвятлілі салон і паглядзелі, што ў ім знаходзіцца. Не ведаю, ці засталіся міліцыянеры чакаць, калі будзе ад’язджаць Мікалай Мяцеліца, але я патэлефанаваў і папярэдзіў сяброў, каб яны былі ўважлівыя”.

Рыгор Кастусёў выказвае здзіўленне тым, што супрацоўнікаў міліцыі ўначы хвалюе пытанне, ці не перавозіць “забароненую літаратуру” кандыдат у дэпутаты Палаты прадстаўнікоў ад партыі БНФ. Ён зазначае, што кандыдату ад улады, які з’яўляецца намеснікам старшыні КДК краіны, Аляксандру Агееву бялыніцкія міліцыянеры такіх пытанняў не задаюць.

“Праваабаронцы за свабодныя выбары”