Сябра партыі левых “Справядлівы свет” Ілону Ткачову са Жлобіна, якая з’яўлялася даверанай асобай кандыдата ў дэпутаты па Жлобінскай выбарчай акрузе №40 Валерыя Рыбчанкі, выклікаюць у міліцыю для расследвання інцыдэнта з выбаршчыкам Бабаньковым.

Нагадаем, падчас выбараў Ілона Ткачова працавала назіральнікам на ўчастку для галасавання №15, дзе быў зафіксаваны шэраг парушэнняў. Так, сябры камісіі выдалі пенсіянеру Бабанькову два бюлетэні. Калі назіральніца падыйшла да мужчыны, мужчына не мог здолець закінуць паперкі ў сярэдзіну скрыні, бо лісты былі згорнутыя ў чатыры столкі. Назіральніца запытала, колькі бюлетэняў трымае ў руцэ выбаршчык, і той, аддаўшы ёй лісты, паказаў, што іх было два.Назіральнікі зафіксавалі гэтае парушэнне і звярнуліся са скаргамі ў пракуратуру ды ЦВК. 

Пасля выбараў Бабанькоў звярнуўся у міліцыю, дзе заявіў, што Ткачова вырвала бюлетэні ў яго з рук. Сам жа выбаршчык патлумачыў, што другі бюлетэнь ён знайшоў у кабіне для галасавання, і вырашыў, такім чынам, прагаласаваць за сваю жонку.

–Мне патэлефанаваў супрацоўнік міліцыі і запрасіў на размову ў мясцовы РАУС, але я не пагадзілася і папрасіла, каб мне даслалі афіцыйную позву, – распавядае спадарыня Ілона. – І хоць міліцыянер не прадставіўся, па голасу я зразумела, што гэта той самы супрацоўнік міліцыі, які працаваў на гэтым участку. Позва мне прыйшла толькі 12 кастрычніка, хоць у самым дакуменце мне прызначылі сустрэчу на 9 кастрычніка. Там было напісана, што я павінна з’явіцца ў мясцовы аддзел міліцыі ў якасці сведкі – пра адміністрацыйную справу і нумар артыкула з Адміністрацыйнага кодэксу не было напісана ні слова. Я, зразумела, нікуда не пайшла.

А вось сам экс-кандыдат Валеры Рыбчанка і яго калега з партыі АГП Марат Афанасьеў на размову вырашылі пайсці:

“У нас запыталіся, што мы думаем на гэты конт, як усё адбывалася, – кажа спадар Рыбчанка.– Мы далі тлумачэнні і ўсё на гэтым скончылася. Цікава, што пакуль ніякай адпіскі нам пакуль не даслалі. Будзем чакаць, чым скончыцца гэтая справа”.