Намеснік старшыні КДК краіны Аляксандр Агееў у сваім выступе па абласному радыё 30 жніўня патлумачыў, чаму ён не хоча ўдзельнічаць у дэбатах з дэмакратычнымі кандыдатамі. Па ягоных словах, чыннікам для гэтага паслужыла тое, што “дыскутаваць можна з тымі, хто прыносіць практычнымі дзеяннямі карысць краіне і людзям”.

У сёлетніх выбарах у Палату прадстаўнікоў кандыдаты ў дэпутаты могуць праводзіць тэлевізійныя дэбаты. Аднак Калінкавіцкая акруговая выбарчая камісія паведаміла, што тут дэбатаў не будзе, таму што кандыдаты ў дэпутаты адмовіліся ад гэтага.

30 жніўня Цэнтрвыбаркам разглядае скаргі незарэгістраваных вылучэнцаў у кандыдаты ў дэпутаты па Мінску. Прэтэндэнтам, у якіх выявілі больш за 15% несапраўдных подпісаў, у рэгістрацыі паўторна адмоўлена. Тыя, у каго знайшлі памылкі ў дэкларацыях аб даходах і маёмасці, часткова зарэгістраваныя.

Івана Шэгу, кандыдата ў дэпутаты ад партыі БНФ, 30 жніўня выклікалі ў Слонімскі РАУС і абвінавацілі ў тым, што яшчэ да рэгістрацыі ў якасці кандыдата ён расклейваў свае перадвыбарчыя ўлёткі, якія распаўсюджвае і цяпер. Гэтыя ўлёткі былі надрукаваныя яшчэ падчас мясцовых выбараў 2010 году, калі сп. Шэга балатаваўся ў дэпутаты.

Старшыню мясцовай суполкі прафсаюза Радыёэлектроннай прамысловасці Галіну Смірнову запрасілі на размову ў КДБ ў панядзелак, 3 верасня. З якой нагоды яе выклікаюць, яна пакуль не ведае.

Назіральнік Сяргей Гоўша атрымаў адказ з ЦВК, дзе паведамляеца, што яго заява ад 22 жніўня разгледжана і зараз ГАУСам Баранавіцкага гарвыканкама праводзіцца праверка па інфармацыі аб нібыта меўшай месца фальсіфікацыі пратакола першага паседжання АВК №5. Назіральнік кажа, што не спадзяецца на аб’ектыўную і справядлівую праверку працы акруговай камісіі.

Старшыня Барысаўскай гарадской арганізацыі АГП Міхаіл Васільеў падаў у Вярхоўны суд скаргу адносна ўчорашняга рашэння ЦВК аб забароне на рэгістрацыю яго кандыдатам.

Рэчыцкі райвыканкам апублікаваў рашэнне, у якім гарадскі пасёлак Зарэчча аднёс да Хойніцкай выбарчай акругі. Рашэнне падпісалі старшыня райвыканкама Пётр Шостак і кіраўнік справамі райвыканкама Сяргей Сташук. Насамрэч пасёлак Зарэчча ўваходзіць у Рэчыцкую выбарчую акругу.

Прэс-служба АГП паведамляе, што ўсе 35 зарэгістраваных ад партыі кандыдатаў выказалі жаданне паўдзельнічаць у дэбатах. Аднак з боку праўладных кандыдатаў актыўнасці не назіраецца. Сакратар ЦВК Мікалай Лазавік тлумачыць гэта тым, што прэтэндэнты пакуль не гатовыя да новай формы камунікацыі з выбаршчыкамі.

Учора каля 23.30 у аграгарадку Вялікая Машчаніца супрацоўнікі бялыніцкай ДАІ спынілі аўтамабіль кандыдата ў дэпутаты Палаты прадстаўнікоў па Шклоўскай выбарчай акрузе № 90, намесніка старшыні партыі БНФ Рыгора Кастусёва. Міліцыянераў хвалявала пытанне, ці не перавозіць кандыдат у дэпутаты “забароненую літаратуру”.

Увагу выбаршчыкаў Пружанскай выбарчай акругі № 9 звяртае на сябе розніца ў даходах мясцовых кандыдатаў у дэпутаты - старшыні райвыканкама Аляксандра Юркевіча і часова непрацуючага сябра АГП Аляксандра Кабанава.

Газета “Шахцёр” апублікавала дадзеныя акруговых камісій аб прыбытках кандыдатаў па салігорскіх гарадской і сельскай акругах. Выявілася, што праўладныя кандыдаты значна багацейшыя за сваіх апазіцыйных супернікаў.

Тэлерадыёкампанія “Брэст” 29 жніўня не паказала выступ кандыдата ў дэпутаты Анжалікі Камбалавай, якая зарэгістравана па Баранавіцкай- Заходняй выбарчай акрузе № 5 ад Аб’яднанай грамадзянскай партыі.

29 жніўня ў Цэнтарвыбаркаме праходзіла разбіральніцтва па пададзеных скаргах ад 3-х незарэгістраваных кандыдатамі прэтэндэнтаў па Лагойскай выбарчай акрузе №75. У выніку было дадаткова зарэгістравана яшчэ 2 кандыдаты, а ўсяго іх цяпер тут – 5.

Дзяржаўныя раённыя газеты Гомельскай вобласці прапануюць кандыдатам у дэпутаты Палаты прадстаўнікоў размясціць агітацыйныя матэрыялы на платнай аснове. Кошты і ўмовы ў розных раёнах адрозніваюцца.